Alam Nagari Kajai
Elok ranahnyo Nagari Kajai nan bagunuang babukik, nan bahutan barimbo labek, nan babukik baguo batu, bangarai balurah dalam, nan tasabuik daerahnyo banamao siranjau batu tajam, luak ujuang batu badongiang, sialang maantakbosi, taroguang batu badonguang, guguak bulek jo guiguak pujan, lokuang gadang jo galo-galo, tanah santo pamakan siriah, luak saok jo pisang kalek.
Nan lunak ditamam baniah nan kareh di buek ladang nan bancah paliaro itiak, ganangan katabek ikan bukik btu ka tambang ameh tambang timbago dan perak, batamam nan papucuak mamaliharo nan banyawa.
Sawah batumpak tumpuak, ladangnyo babidang bidang, sawah batumpuak nan data, ladangnyo babidang di nan lereng, banda baliku turuik bukik cancang latiah niniek moyang tambilang kayu urang tuo-tuo.
Suku diagiah bapangulu, nagari baampek suku, dalam suku barumah gadang, kampuang diagiah batuo, rumah dibari batungganai, nagari bapaga dengan undang, kampuang bapaga nan di buek, nan basosok bajurami, bapandan pakuburan, balabuah tapian, bakorong bakampuang, barumah batanggo basawah baladang, babalai balai, bamusajik, adat basabdi syarak, syarak basandi kitabullah syarak mangato adat mamakai, adat kawi syaraknyo lazim.
***
Sejarah Nagari Kajai
Di pandang-pandang dipatok
Dikira-kirai dikaka
Tatangguak ikan galomo
Dibilang-bilang dipatok
Dikisa-kisai di papa
Dibukak sitambo lamo
Takalo maso daulu
Samusim maso saisuak
Katiko langik basentak turun
Bumi basentak naiak
Lawik sacampak jalo
Tanah darek alun lai leba
Nan tumbang gunuang marapi
Lorong niniak moyang kito
Nyolah Datuak Maharajo Dirajo.
Asa usuah kalau dikaji
Didalam sitamba lamo
Sapih balahan tigo jutai
Sajurai kabinua ruhun
Sajurai kabinua cino
Sajurai ka pulau ameh nangko
Pihak di ninik moyang kito
Inyolah Datuak Maharajo Dirajo
Balayia inyo maso itu
Dalam dandang nan sabuah
Cukuik jo cati bilang pandai
Indak lamo dandang balayia
Didalam lawik Amarullah
Tampaklah api takijok-kijok
Diateh puncak anggo duri
Gunuang suatu maso itu
Banamo gunuang marapi.
Darimano titiak palito
Dari baliak telong nan batali
Dari mano asa niniak kito
Dari puncak gunuang marapi
Dari pariangan, Padang Panjang….
Basentak turun kabawah
Lah tibo di Guguak Ampang
Sinan ligundi nan baselo
Dibawah bukik patah batigo
Banamo Bukik Patah Sambilan
Sinan sirangkak nan badangkang
Sarato buayo putiah daguak
Sinan bintuak nan barayun.
Sinan mulo bataratak
Sabalum bakorong dengan bakampuang
Sabalum bakoto jo nagari
Maso badeta-deta upiah
Maso bacawan panarahan.
Dek lamo alam baputa, urang batambah banyak juo, iyo dari Pariangan Padang Panjang, taruih ka Gunuang Talang, dari Puncak Panjaringan, rombongan nan dipimpin Datuak Bandaro Sati, bajalan manurun manuruik batang aie, sampai di suatu daerah kemiringan, disepakati baranti disitu, ditarukolah sawah dengan ladang,dibuek rumak kadiaman, daerah nantun dibarinamo Koto nan balainyo yaitu Balai Satu, pakannyo tiok hari Sabtu.
Tasabuiklah Datuak kapalo kaum, nan bagala Datuak Rajo Lelo, mamaliharo tigo ikua kudo, nan salalu lapeh dari pautan, pai mnum manuju anak aie, dimuko sabuah guo.
Alkisah pado suatu hari, hari nan sadang tangah hari, kudo marentak lapeh, lari manuju anak aie, mancaliak keadaan sarupo nantun, Datuak kapalo kaum maikuti, sampai di lereng bukik. Dek kancang kudo balari, mako sikua kudo jatuah kabawah jalan, Datuak kapalo kaum sangeklah berang, mangko manyumpah sakutiko, dek Tuhan maha kuaso, kudo nan jatuah manjadi batu, sampai kini disitu banamo KUDO TAGOLEK.
Kudo nan duo taruih balari sahinggo hilang dari pandangan, dek kaadaan sarupo itu diimbau urang nan banyak, mako kudo nantun di KAJA-I.
Dek lambek lamo di jalan sampai dimuko sabuak guo, iolah Datuak Sutan Dilangik, baduo jo Khatib Rajo, basobok kudo sadang minum, lalu diimbaukan kapado urang punyo, Datuak Rajo Lelo pun tibo, mancaliak kudo sadang minum, dihariak kareh maso itu, nan sikuah lari kateh, nan sikuah lai yaitu induak kudo hanyo tagak badiri, sakadar maengong kabalakang, mako manjadi batu kudo nantun, sahinggo banamao BATU KUDO.
Kudo nan lari kateh, sampai di bukik batu, tibo disinan kudo nantun, dek kekuasaan Tuhan dipaliekkan, kudo itupun jadi batu, mako daerah nantun banamo BATU TANGAH.
Diliek daerah sakitar guo, daerah nan patuik untuak tampek diam, mungkin untuk manaruko sawah jo ladang, kamudian dibaoklah anak jo kamanakan untuak pindah ka daerah baru nanko, mako daerah Koto banamao KOTO TINGGA.
Takalo Nagari ka dicacak, alun baBalai –balai baMusajik, mako di KAJA-I untuak bamusyawarah, artinyo tanpa persiapan yang memadai, diundang Datuak nan sambilan dari limo Nagari, duo urang Datuak dari Kubang, duo dari Kolok, duo dari Lunto, duo urang dari Sibarambang, sarato satu urang Datuak dari Kajai sabagai nan tuo, yaitu di Balerong Batu Sandaran tampek kito bakaru hari nanko.
Tujuan diadokan rapek, nak bulek aie ka pambuluah bulek kato jo mufakat tantangan mancari Namo Nagari, manatapkan status tanah ulayat Nagari jo ulayat Suku, nan balingkuang aru babingkah tanah sarato manatapkan Undang-Undang Nagari.
Tibolah Datuak nan sambilan, duduak basanda di batu nan sambilan pulo dakek sabatang katu gadang, mako basidang datuak-datuak disinan.
Sejarah namo Nagari ado tigo hal nan manjadi partimbangan :
1. Sabab makonyo ditamukan daerah baru nanko, karano dek kudo nan lapeh diKAJA-I urang sakampuang.
2. Tajadi musyawarah tanpa persiapan memadai atau di KAJA-I
3. Bamusyawarah di dakek batang kayu gadang, diagak dikanang-kanang indak pueh mancaliak sajo, ditakiak batang kayu nantun, bagatah kironyo kayu, dijujuik namuahnyo panjang, talalu panjangnyo mangalantiang, mako tarnyato batang kayu nantun banamo batang KAJAI.
Mako sapakek sagalo Datuak nan sambilan manatapkan namo Nagari yaitu NAGARI KAJAI.
Dek kamanakan batambah banyak juo, mako dibuek sawah jo ladang, dibuek adat di karang undang, disusun tangkai ciek-ciek, di paku ka tiang panjang.
Kok dikambang saleba alam
Kikumpa sabalun kuku
Tantang Sajarah Nagari nanko
Tambo sakiro iko dulu dibaco
Pitalah jo kato tuo
Sitabah di baliak papan
Kok salah tobat lah ambo
Kok bana samo diamalkan
***disadur dari pidato Kepala Desa Balai Batu Sandaran dan Ketua KAN Nagari Kajai pada acara "karu" nagari.
Baca selengkapnya...
